Аймгийн Засаг даргаас өгсөн үүрэг даалгаврын дагуу холбогдох албаны мэргэжилтнүүд болон ШӨХТГ-ын байцаагч нарын хамтарсан ажлын хэсэг Орхон аймагт үйл ажиллагаа явуулж буй шатахуун түгээгүүрийн компаниудад шалгалт явууллаа.         Холбогдох албаны хүмүүсийн мэдээлж байгаагаар ОХУ-аас нийлүүлж буй нийлүүлэлт багассан тул  ийнхүү хомстол үүсч, хэрэглэгчдэд лимиттэйгээр олгож эхлээд байгаа ажээ.       Орхон аймагт 7 компаний 30 гаран шатахуун түгээгүүрийн газар үйл ажиллагаа явуулдаг. Үүнээс Петровис ХХК, Шунхлай ХХК, Магнай трейд ХХК-ын баруун бүсийн аймгуудад шатахуун хувиарладаг агуулах нь манай аймагт байрладаг. Бусад Жаст ойл ХХК, Сод монгол ХХК, ТЭС Петролиум ХХК зэрэг түгээх байгууллагууд  Улаанбаатар хот болон Дархан хотоос шатахуунаа зөөвөрлөдөг ажээ.       Яг өнөөдрийн байдлаар Петровис компанийн агуулахад АИ-92 бензин гурав хоногийн нөөцтэй байгаа бол Шунхлай, Магнай трейд компанийн агуулах шатахуунгүй буюу зөвхөн түгээх станцуудад шатахуун байна гэдгийг хэлж байлаа.       Хэвийн үед өдөрт 130 тонн АИ92 хэрэглэдэг буюу долоо хоногт 6-7 вагон шатахуун манай аймагт тээвэрлэгдэн ирдэг байжээ. Гэвч өнөөдрийн байдлаар долоо хоногт 1 вагон буюу ердөө 60 тонн тээвэрлэгдэн ирж байгаа мэдээллийг өгч байлаа.       Иргэдийн хувьд зөвхөн Эрдэнэт хотод шатахууны хомстол үүсээд байгаа талаарх гомдлыг ирүүлж байгаа. Төрийн байгууллагууд буюу бусад орон нутгаас авсан мэдээллээр Улаанбаатар хотоос бусад аймгуудад шатахуун хомстож лимиттэйгээр олгож байгаа ажээ.