Орхон аймгийн Засаг даргын Даваа гараг бүрийн шуурхай зөвлөгөөн өнөөдөр боллоо. Хуралдааныг Орхон аймгийн ЗДТГ-ын дарга Д.Соёлчхүү удирдлаа. Шуурхай зөвлөгөөний эхэнд аймгийн ЗДТГ-ын ХШҮДАХ-ийн дарга К.Жанболат өмнөх шуурхай зөвлөгөөнөөс өгөгдсөн үүрэг даалгаврын биелэлтийг танилцуулав. 2021 он гарсаар Засаг даргын шуурхай зөвлөгөөн нийт 46 удаа хуралдаж, 427 үүрэг даалгаврыг өгч ажилласан байна. Аймгийн Шуурхай зөвлөгөөнөөс өгсөн үүрэг даалгаврын биелэлтийг хагас бүтэн жилээр нэгтгэн тайлагнадаг. Малын гоц халдварт “Шүлхий” өвчний тохиолдол хөрш зэргэлдээ аймаг, сумдад батлагдсантай холбогдуулан манай аймаг 72,3 мянган тун вакциныг татан авч, вакцинжуулалтын ажлыг эхлүүлсэн бөгөөд одоогийн байдлаар 48.300 толгой мал буюу 42.3 хувьтай явагдаж байгаа аж. Аймгийн Засаг даргаас өгсөн үүргийн дагуу сургуулийн спорт заалыг сурагчдад, анги хамт олноор нь хуваарь гаргаж үнэ төлбөргүй ашиглуулж байх үүргийг БСУГ-аас сургуулийн захирлуудад өгчээ. Эрүүл мэндийн газрын даргын мэдээлснээр сүүлийн үед томуу томуу төст өвчний дэгдэлт нэмэгдэж өмнөх 7 хоногоос 29.9 тохиолдлоор, өмнөх оны мөн үеээс 12.3 тохиолдлоор, сүүлийн 3 жилийн дунджаас 24.5 тохиолдлоор их байна. Томуу томуу төст өвчний нийт тохиолдлын 64.9 хувь нь 0-15 насны хүүхдүүд эзэлж байна. Томуугийн дэгдэлт нэмэгдэж буйтай холбоотойгоор ЕБС-ийн сурагчид энэ сарын 10-ны өдрөөс эхлэн цахимаар хичээллэж, 18-ны өдрөөс эхлэн нэгдүгээр улирлын амралт эхэлнэ. Хуралдааны төгсгөлд аймгийн ЗДТГ-ын дарга Д.Соёлчхүү төрийн байгууллагууд болон хувийн хэвшлийн ААН-үүдэд хандаж сурагчдын амралтын хугацаанд жирэмсэн болон бага насны хүүхэдтэй ээжүүдийг цахимаар ажиллах боломжоор хангах уриалгыг гаргалаа. Сурагчдын амралт эхлэхэд эцэг эхчүүд ажилдаа явахдаа хүүхдээ харах хүнгүйгээр гэр орондоо цоожилж орхих зэрэг явдлаас улбаалан хүүхдүүд түлэгдэх, унаж бэртэх, тогонд цохиулах, гал түймрийн гамшигт өртөх гэх мэт ахуйн осол, гэмтэл нэмэгддэг байна. Тиймээс, 1. Сурагчдын амралтыг зүй зохистой өнгөрүүлэх 2. Хүүхэд гэртээ ахуйн осол гэмтэлд өртөхөөс урьдчилан сэргийлэх 3. Хүүхэд хамгааллын талаар анхаарч ажиллахыг холбогдох байгууллагуудад ЗДТГ-ын даргын зүгээс санууллаа.
